Loading
Channel: @CanMen
#住加男人 #CanMen #英國 Wingo繼續佢嘅英國之旅。今站嚟到鄰近伯明翰（Birmingham）嘅城市Solihull，探訪當地一對港人夫婦Rory同Fion；佢哋去年6月29日移英，至今大概1年，由佢哋口中講吓呢一年親歷Solihull嘅變化，最好不過。 Rory本身係專業攝影師，Fion係專業化妝師，年輕時喺伯明翰讀3年大學、做過3年嘢，以為佢哋去年選擇移英順理成章？其實唔係。兩人本身諗住移民加拿大，Rory甚至已喺溫哥華搵到工，工簽已批……而Fion亦考慮過Winnipeg，有學校收咗……但點解佢哋最終都放棄移加呢？ 躊躇之下，英國公佈「BNO 5+1」方案，令Rory同Fion決定扑槌移英。 雖然話兩人喺伯明翰度過6年光陰，但主要都喺市中心附近生活，未正式住過Solihull。之所以決定落戶Solihull，除咗朋友推薦，主要係有唔少好學校。 要講熱鬧、新穎，Solihull當然比唔上伯明翰，但就俾到一個環境清幽嘅感覺Rory同Fion，「治安唔錯，學校亦OK」。佢哋坦言，越來越多香港人嚟Solihull，「我哋去超市買餸，裡面廿幾個顧客有十幾個係香港人」，所以有情況係有啲小朋友嚟咗半年，都未派到學校。去年11月有凝聚港人活動，當時統計過當地中小學多咗300、400個香港學生，到今年係多咗700個，保守估計有200、300個家庭嚟咗，「有小朋友要跨區讀書」。 Rory同Fion聽聞有個案，一對夫婦嘅兩個小朋友被派到唔同學校，由於冇車，兩公婆送小朋友返學就要「向左走向右走」，一人送一個。 越來越多人，自然會令資源出現緊張，而社區亦可能未準備好，消化唔到新增人口，例如增加醫療系統壓力，「打電話book睇醫生，通常要等1小時以上，所以好多人講笑話要請假打電話」。 至於會唔會惹嚟「搶資源」爭拗，Rory同Fion都話本地人普遍welcome香港人，「因為佢哋知香港發生咩事」。兩人仲分享一次帶小朋友去公園玩、遇到嚟自倫敦嘅警察街坊經歷，令佢哋感到一絲暖意。 目前嚟講，仲有唔少香港人對移民心大心細，其中一個原因係擔心「英文好屎點算」？Fion斬釘截鐵話「一定唔使驚！」自稱較保守嘅Rory就話要睇年紀、背景同家庭負擔，同埋「有幾願意放低自己，做唔講英文工作……」佢仲分享一個喺香港做會計師做到極高層，嚟到英國做倉務員、「拎最低工資多少少」嘅故事俾大家，重點想講，唔好介意轉跑道，「唔好框住自己，願意工作就能夠更快融入社會，習慣英語環境」。 至於移英有咩落腳點推介？Fion都有唔少心得分享俾大家～ ＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝ 住加男人YouTube及Patreon會員專享獨家直播及Discord對話區 Patreon會員：https://www.patreon.com/canmen YouTube會員：https://bit.ly/2PwNskm PayPal單次支持住加男人：https://www.paypal.me/canmen ＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝ 「住加財經」加港財經資訊頻道 https://www.youtube.com/channel/UCsbs17SJBmI4k1GtzQZc7Nw
「住加男人」Facebook專頁 https://www.facebook.com/CanMenca/
「住加男女」Facebook群組分享加港資訊及新聞 https://www.facebook.com/groups/859426267552840/